कार्तिक १०, २०८३ / 2026-10-25
काठमाडौं: नेकपा एमालेको हिजो सम्पन्न वडा अधिवेशनबाट अध्यक्ष चुनिएका सिन्धुपाल्चोकका एक नेताले पद अस्वीकार गरेका छन् । सिन्धुपाल्चोक चौतारा साँगाचोकगढी नगरपालिका वडा ४ का रुद्र सापकोटालाई सिन्धु एमालेले वडाध्यक्षमा चयन गरेका थिए ।
वडा ४ को वडाध्यक्षमा चयन गरेपछि सापकोटाले विज्ञप्ति जारी गरेर आफूलाई झुक्क्याएर वडाध्यक्ष बनाएको आरोप लगाएका हुन्। आफूलाई छलफल छ भनी बोलाएर वडाध्यक्षमा मनोनयन गरेको उनले बताएका छन्। सापकोटाले एमालेप्रति आफ्नो कुनै आस्था र विश्वास नरहेको पनि प्रस्ट पारेका छन्। आफूले हालै नवीकरण गरेको माओवादीको सदस्यतासमेत सार्वजनिक गरेका छन्।
‘तपाईसँग छलफल छ भनी बोलाएर त्यहाँ मलाई वडा कमिटी अध्यक्ष बनाएता पनि उक्त पार्टीप्रति मेरो कुनै संलग्नता नरहेको स्पष्ट पार्न चाहन्छु। साथै सो दलप्रति कुनै आस्था र विश्वास नरहेको र मेरो आफ्नो संगठन नेकपा माओवादी केन्द्रको सदस्यता यसअघि नै नै नवीकरण गरिसकेकोले सम्पूर्ण वडावासीमा अवगत गराउँदै अनावश्यक भ्रममा नपर्न हार्दिक अनुरोध गर्दछु,’ उनले भनेका छन्।
