कार्तिक ९, २०८३ / 2026-10-24
काठमाडौंः नेकपाका उपाध्यक्ष बामदेव गौतमले सर्वोच्च अदालतको संवैधानिक इजलासले गरेको निर्णयलाई स्वागत गर्दै राष्ट्रपतिले प्रतिनिधिसभाको अधिवेशन आह्वान गर्नुपर्ने बताएका छन् । त्यस्तै, प्रधानमन्त्री केपी ओलीले ढिला नगरी तुरुन्त प्रधानमन्त्रीबाट राजीनामा दिनुपर्ने गौतमको भनाइ रहेको छ ।
सर्वोच्च अदालतले मंगलबार प्रधानमन्त्री ओलीले पुसमा ५ गरेको प्रतिनिधिसभा विघटन असंवैधानिक भएको ठहर गर्दै उक्त निर्णय बदर गरिदिएको थियो । यस विषयमा प्रतिक्रिया दिँदै गौतमले अध्यक्षद्वय केपी ओली र प्रचण्डलाई पार्टीको सचिवालय बैठक बोलाउन समेत आग्रह गरेका छन् ।
‘प्रधानमन्त्री केपी ओलीले गत पुसमा ५ गर्नुभएको प्रतिनिधिसभा विघटन असंवैधानिक ठहर भएको छ,’ गौतमले जारी गरेको प्रेस विज्ञप्तिमा भनिएको छ, ‘आजको दिन निरंकुशता स्वेच्छाचारिता, अराजकता र दुराचारीताको पराजय तथा संविधान, कानुन, लोकतन्त्र र जनताको सार्वभौमिकताले पुनर्विजय प्राप्त गरेको ऐतिहासिक दिन हो ।’
