कार्तिक १०, २०८३ / 2026-10-25
काठमाडौँ । राष्ट्रिय प्रजातन्त्र पार्टी (राप्रपा)ले काठमाडौं, ललितपुर र पोखरा महानगरपालिकामा मेयरको उम्मेदवारको टुंगो लगाएको छ । राप्रपाले काठमाडौंमा कलाकार मदनदास श्रेष्ठलाई मेयरको उम्मेदवार बनाउने भएको छ ।
त्यसैगरी ललितपुरमा अष्ट महर्जन र पोखरामा शंकर खराललाई मेयर उठाउने निर्णय गरेको प्रवक्ता मोहन श्रेष्ठले बताएका छन् । महर्जन ललितपुरका पूर्वअध्यक्ष हुन् भने खराल विश्व हिन्दु महासंघका उपाध्यक्ष हुन् ।
खराल २ महिनाअघि मात्रै राप्रपामा प्रवेश गरेका थिए । श्रेष्ठले अन्य महानगर र उप महानगरपालिकाको उम्मेदवारी शुक्रबार बेलुकासम्म टुंगो लगाउने बताए ।
त्यसैगरी बुटवल उपमहानगरपालिकामा व्यवसायी मृगेन्द्र शेरचनलाई प्रतिस्पर्धा गराउने भएको छ । शेरचन बिहीबारबाट राप्रपामा प्रवेश गरेका थिए ।
त्यसैगरी रुपन्देहीको भैरहवा नगरपालिकामा सागरप्रताप राणा, देवदह नगरपालिकामा माधव रिमाल र तिलोत्तमा नगरपालिकामा भुवन खनाललाई मेयरको उम्मेदवार बनाउने निर्णय गरेको छ ।
त्यसैगरी रुपन्देहीको रोहिणी गाउँपालिकाकाको प्रमुखमा ताहिर अलीलाई उम्मेदवार बनाउने भएको छ । त्यस्तै राप्रपाले नेकपा एमाले अध्यक्ष केपी शर्मा ओलीको गृह नगरपालिका दमकमा राम थापालाई उम्मेदवार बनाउने निर्णय गरेको छ ।
