कार्तिक १०, २०८३ / 2026-10-25
नेकपा (एमाले)का प्रचार विभाग उपप्रमुख विष्णु रिजालले नेकपा (माओवादी केन्द्र)का अध्यक्ष पुष्पकमल दाहाल प्रचण्डले अझै एमालेका नेता–कार्यकर्तामाथि आँखा लगाएको टिप्पणी गरेका छन्।
आफ्ना नेता कार्यकर्ताबाट पार लाग्न संभव छैन भनेरै प्रचण्डले एमालेका नेता–कार्यकर्तामाथि आँखा लगाएको उनको आरोप छ।
‘एमालेका नेता–कार्यकर्तामाथि आँखा लगाउनु भनेको आफ्ना नेता–कार्यकर्ताबाट पार लाग्न सम्भव छैन भनेरै हो। हामीले दोस्रो अध्यक्ष भए पनि मानेकै थियौँ, ठूल्ठूला कार्यक्रममा भाषण गर्न पाउनु भएकै थियो।’ प्रचण्डको बुधबारको अभिव्यक्तिप्रति लक्षित गर्दै रिजालले सामाजिक सञ्जालमा लेखेका छन्, ‘तपाईंलाई कुन बैरीले उचाल्यो र अहिले एमालेका नेता–कार्यकर्ता हेरेर घुटुघुटु थुक निलिरहनुभएको छ ?’
प्रचण्डले बुधबार पार्टी कार्यालयमा आयोजित कार्यक्रममा हजारौं एमाले कार्यकर्ता माओवादीमा गोलबन्द गर्न सकिने बताएका थिए। उनले तीन वर्ष नेकपामा छँदा एमालेमा माओवादी बिउ रोपेको र केही समयपछि फल्ने फुल्ने पनि बताएका थिए।
‘माओवादी पार्टीको कुनै भविष्य छैन भन्नेमा उहाँ स्पष्ट हुनुहुन्छ।’ उनले लेखेका छन्, ‘त्यही भएर उहाँ चुनावमा कहिले एमालेसँग टाँसिनुहुन्छ, कहिले कांग्रेसको सहारा खोज्नुहुन्छ।’
