कार्तिक १०, २०८३ / 2026-10-25
जनता समाजवादी पार्टी (जसपा)का अध्यक्ष उपेन्द्र यादवले आफूहरूले मन्त्री फिर्ता बलाउने वा नयाँ मन्त्री सिफारिस गर्ने कुनै निर्णय नगरेको बताएका छन् । जसपाले अहिले मन्त्री फिर्ता बोलाएको भन्दै हल्ला चलाइएको र त्यो हल्ला नियोजित भएको उनको भनाइ छ ।
उनले मन्त्रिपरिषद्मा हेरफेर गर्दा पार्टीभित्र छलफल गरेर मात्र निर्णय लिइने बताए । अहिले अमुक ठाउँबाट गलत नियतका साथ हल्ला चलाइएको उनले बताए ।
जसपाबाट मन्त्री बनेका कृषि तथा पशुपक्षी विकासमन्त्री महिन्द्र राय यादवले पनि फिर्ता हुनेबारे आफूलाई कुनै जानकारी नआएको बताए । जसपाबाट मन्त्री बनेकाहरू नै अध्यक्ष यादवविरुद्ध लागेको भन्दै उनीहरूलाई फिर्ता गरिने चर्चा केही दिनअघिदेखि नै चलेको थियो ।
यता, अध्यक्ष यादव र संघीय परिषद्का अध्यक्ष डा. बाबुराम भट्टराईबीच सहमतिमै अलग हुने समझदारी भइसकेको छ ।
