कार्तिक १०, २०८३ / 2026-10-25
काठमाडौंः जनता समाजवादी पार्टी नेपालका अध्यक्ष उपेन्द्र यादवले गठबन्धनबिना पनि चुनाव लड्ने अवस्था आउन सक्ने भन्दै त्यसको लागि तयार रहन नेता तथा कार्यकर्तालाई निर्देशन दिएका छन् । बुधबार वीरगञ्जमा आयोजित पार्टी अगुवा कार्यकर्ता भेला तथा प्रशिक्षण कार्यक्रममा उनले सो निर्देशन दिएका हुन् ।
सत्ता गठबन्धनमा रहेका पाँच दलकै ध्यान मधेस प्रदेशतिर छ । जसपा भने त्यहाँ अरू दललाई प्रवेश दिनै चाहेको छैन । उता मधेस प्रदेशमा एक सिट भए पनि कांग्रेसले जसपाभन्दा बढी सिट लिने अडानमा छ । नेकपा एकीकृत समाजवादी पार्टीले अरू प्रदेशभन्दा मधेस प्रदेशमा आफ्नो संगठन बलियो रहेको दाबी गर्दै उसले पनि सबभन्दा बढी सिटको दाबी गरिरहेको छ । माओवादी केन्द्रको पनि सोही अनुसारको डिमान्ड छ ।
मधेस प्रदेशकै कारण पनि गठबन्धन टुट्न सक्ने अवस्था सृजना भइरहेको गठबन्धनभित्रकै नेताहरू बताउन थालेका छन् । जसपाले देशभरमा प्रतिनिधिसभामा ३० र प्रदेशसभामा ६० सिटको माग गरेको छ । त्यसमा मधेस प्रदेशमा मात्र कम्तीमा प्रतिनिधिसभामा २० र प्रदेशसभामा ३० सिट हुनुपर्ने अडानमा छ ।
