कार्तिक ९, २०८३ / 2026-10-24
कोशी प्रदेशमा नेपाली कांग्रेस संसदीय दलका नेता उद्धव थापाले बिहीबार मुख्यमन्त्रीमा दाबी पेश गर्ने भएका छन् ।
नेपाली कांग्रेसका उद्धव थापालाई मुख्यमन्त्री बनाउन दाबीसहित कोशी प्रदेशका गठबन्धन दल साढे ४ बजे प्रदेश प्रमुखकोमा जाने तयारीमा लागेका छन् ।
राप्रपाले साथ नदिएपछि सभामुख बाबुराम गौतमलाई समेत माओवादीको सदस्य गनेर गठबन्धन दलले बहुमत जुटाएका हुन् ।
साढे ४ बजे सांसदहरूको हस्ताक्षर संकलनसहित प्रदेश प्रमुखकोमा जाने कांग्रेस संसदीय दलका प्रमुख सचेतक भूपेन्द्र राईले बताए ।
शुक्रबार विश्वासको मत नपाएर एमालेका हिक्मतकुमार कार्की नेतृत्वको सरकार ढलेपछि प्रदेश प्रमुखले नयाँ सरकार गठनका लागि दाबी पेस गर्न दिएको समयसीमा आज बिहीबार साँझ ५ बजे सकिँदै छ ।
कोशी प्रदेशको गठबन्धनमा कांग्रेसका २९, माओवादी केन्द्रका सभामुखबाहेक १२, नेकपा एसका ४ र जसपाका १ गरी ४६ सीट छ । सभामुखलाई दलको सदस्य मानेर गठबन्धनले बहुमत पुर्याउन खोजेको हो । एमाले-राप्रपा गठबन्धनसँग पनि ४६ सांसद छन् ।
